Oanehaččat | Uánihávt | Vuäʹnkânji

Ohcejogas Pisara lei báhkka luohká valimus

Vahkuloahpas Ohcejoga heargegilvvuid báhkka luohkká A finála vuittii Pisara-nammasaš heargi. Dan oamasteaba Saukko ja Heikkilä Narkaus bálgosis. Pisara áigi lei 1.18.383 ja dat lei gilvvuid buot buoremus áigi. 

Rabas luohkká A finála vuittii Kina heargi, dan oamasta Seppänen Hanna-Mari Pintamo bálgosis. Kina áigi lei 1.20.196.

Hearge cup -oassegilvvut joatkašuvvet boahtte vahkuloahpa Sallas. Anáris gonagasgilvvut leat njukčamánu maŋimuš vahkuloahpa. 

Gaccebaččaid mearri molsašuddá

Biepmama ánssus buoide -ja alitgaccebaččaid mearri lea lassánan Suomas.

Áššis diehtá ovdamearkan loddeberošteaddjiid Birdlife-organisašuvdna.

Sierra dieđuid mielde vuovdegaccet ja dábálaš gaccet geat geahppánanguvlui áŋgge máddelabbos ja sivvan leat eallinbirrasiid nuppástuvvan.

2000-logus erenomážit vuovdegaccebaččaid mearri lea geahppánan juoba 70 proseatta.

Nuppedafus ain davvelabbos dihttojit maid ođđa šlájat, dego guossa, -bađoš -ja vuoktagaccebaččat.

Beatnagat galget leat gitta

Beatnagiid gittadoallanáigi álgá sotnabeaivvi, njukčamánu vuosttaš beaivvi olles riikkas.

Áššis mearriduvvo meahcástuslágas. Gittadoallanmearrádus lea fámus borgemánu 19.beaivvi radjai ja dat guoská čoahkkebáikkiid olggobeale guovlluid.

Čoahkkebáikkiinhan beatnagiid galgá doallat gitta birra jagi.

Beatnagiid gittadoallanmearádusain háliidit addit ráfi luondduealliide daid čivganáiggis.

Ovdamearkan lottit álkket hilgot beasi juos beana ráfehuhttá.

Narkotihkaid vuovdit bohtet turisttaid maŋis čuoiganguovddážiidda

Lappi turisma stuorrun buktá maiddái narkotihkaidvuovdiid davás. Eanemus narkotihkaid vuvdet Lappis giđđadálvvi. Vuovdin dáhpáhuvvá neahtas ja dihto gulahallanreaidduin. Muhtumat juobe mákset iežaset luomu davvin dainna go vuvdet narkotihkaid čuoiganguovddážiin. 

Čuoiganguovddážiin narkotihkaid geavaheapmi laktása festemii ja kokaiinna geavaheapmi oidno turisttaid gaskkas. Maiddái sesoŋŋabargiid joavkkus leat narkotihkaid geavaheaddjit, muitalit Lappi bolesis.

Miellačájeheamit Riehpovuona ruvkedoaimmaid vuostá

Raba gova stuorábun

Norgga ambassáda šiljus lágiduvvo miellačájáhus Nussir ruvkedoaimmaid vuostá. 

Plána mielde Riehpovutnii láhka Hámmerfeasta gávpoga Finnmárkkus ceggejuvvo veaikeruvkke. Dat lea earret eará ožžon lobi luoitit duolvačáziid vutnii. Reddrerepparfjord Instagram-siiddu mielde miellačájáhusat leat duorastaga maid Norggas Oslos, Englánddas Londonis, Sveiccas Geneves, Duiskkas Hamburgas, Austrália Melbournes, USA:s New Yorkas. 

Dáppe sáhtát lohkat eanet das makkár miellačájeheamit Riehpovuonas ledje geasset.

Raba gova stuorábun

Raba gova stuorábun

Vikkai lobiheamit doalvut guollebuktagiid Norggas – Gáregasnjárgga tuollárat bissehedje

Okta lietuvalaš lea áššáskuhtton go lea lobiheamit dolvon dorskiid ja gonagasreappáid Norggas. Suomas Gáregasnjárgga tuollárat goit bissehedje su miessemánus 2022. 

NRK Troms og Finnmark mielde Oarje-Finnmárkku diggegotti áššáskuhttima mielde lietuvalaš almmái lei váldán vuostá lobiheamit bivdojuvvon guliid 4,5 tonna ovddas muhtun bisánanbáikkis Porsáŋggus. Dáid guollebuktagiid árvu lei 1,2 miljovnna kruvnnu.

Veli-Matti Ruotsalainen evttohuvvo ovddidanhoavdan

Ohcejoga gielddaráđđehus evttoha váldostivrrii, ahte dat vállješii ovddidanhoavdan Veli Matti Ruotsalainen. Ohcejoga gielda ohcagođii ovddidanhoavdda juovlamánus. Dasa ohce 18 olbmo. 

Ovddidanhoavda jođiha ovddidan- ja birasdoaibmasurggiid.

Romssas eandaliige nuorain negatiivalaš jurdagat turismmas

Eai buohkain leat positiiva jurdagat turismmas eandalii Romssas, muitalii NRK Nordnytt maŋŋebárgga. Romssa guovllus nuorain leat eanemus negatiiva jurdagat turismmas. Ášši čielgá viiddis gažadeamis, masa vástidedje badjel 17 000 olbmo.

Nuorra olbmot cuiggodit ovdamearkka dihte dan, ahte viessohattit leat divron olu. Viessohattit leat divron maiddái ránnjágielddas Ivggus. Olbmot leat maiddái giksašuvvan go ovdamearkka dihte busset leat spagga dievva turisttaid dihte. 

Seamma ovdáneapmi lea Roavenjárggasge, gos lea váttis gávdnat vistti. Máŋggat studeanttat leat fárren eret Roavenjárggas viessováni dihte. 

Máŋŋebárgga infodilálašvuohta Áŋŋel-Boares Gáregasnjárga -boazoáiddis

Eallinfápmoguovddáš ordne otne neahtas infodilálašvuođa boazoáiddi huksemis Áŋŋelis gitta Boares Gáregasnjárgii. Dilálašvuohta lea diibmu 14-16.

Dilálašvuođas muitalit huksema muttuin ja maiddái arkeologalaš inventerema bohtosiin.

Dilálašvuhtii lea galgan álmmuhit ovddalgihtii, muhto dat báddejuvvo ja almmustuvvá maŋŋá eallinfápmoguovddáža neahttasiidduide.

Muoná seaŋgaossodaga ja Gárasavvona dearvvasvuođadálu eai gidde

Lappi buresveadjinguovllu guovlostivrra mearridii seailluhit Muoná seaŋgaossodaga. Gárasavvona dearvvasvuođadállu maid seailu. 

Lappi guovloráđđehus lei evttohan guovlostivrii Gárasavvona dearvvasvuođadálu giddema muhto guovlostivra mearridii seailluhit dan. Guovlostivra jienastii áššis ja jienain 41- 17 dat seailluhuvvo, čállá Lapin Kansa -aviisa.

Buresveadjinguovlu galgá seastit 40 miljovnna euro ja danin heaittihit dearvvasvuođabálvalusaid miehtá Lappi.