Helse Møre og Romsdal

Helseminister Jan Christian Vestre vil ikkje gi krisepakke til sjukehusa i Møre og Romsdal.

Det skriv Sunnmørsposten.

Helse Møre og Romsdal skal spare 700 millionar i løpet av dei neste fire åra. Dei har varsla kutt som vil gå ut over tilsette og pasientar.

Frank Sve i Frp har bedt om ei krisepakke til Helse Møre og Romsdal, tilsvarande den Helse Nord får på 300 millionar kroner.

Fleire sjukehus slit med store underskot etter store investeringar i IT-tenester og nye bygg. Helseministeren meiner dette ikkje er svaret åleine for Møre og Romsdal, og peiker på ein vekst i bemanning på 10 prosent frå 2019-2024.

Han viser til at helseføretaka er plikta å halde seg innan budsjettrammene som Stortinget vedtek.

Fagdirektør Erik Ganesh Søegaard i Helse Møre og Romsdal meiner det var forsvarleg å oppretthalde ordinært beredskapsnivå ved Volda sjukehus, trass i at CT-maskina var ute av drift i august og september. Det skriv Møre-Nytt.

Pasientar med behov for akutt CT-diagnostikk vart overførte til Ålesund sjukehus, og føretaket meiner risikoen for prognosetap vart redusert til eit akseptabelt nivå.

Fylkeslegen seier at dei tek tilbakemeldinga til etterretning og avsluttar saka, skriv avisa.

SV-politikar Marit Aklestad meiner det hastar med å få avvikla helseføretaka.

Ein uttale som Aklestad tok initiativet til, og som peikar på eit prekært behov for å utvikle andre måter å styre sjukehusa på, fekk samrøystes støtte i fylkesutvalet førre veke.

Aklestad meiner helseføretaka har spelt fallit, og at det må kome ei endring.

Ein feil i eit system førte til at 1800 tilsette i Helse Møre og Romsdal har mista tilgang til å logge på kjernejournal, signere sjukemeldingar og e-resept.

Etter kvart fekk ein opp ei avgrensa løysing med pålogging til Helseplattforma med BankID, men med funksjonar som mangla.

– Feilen vil ikkje få konsekvensar for pasientbehandlinga, bedyrar medisinsk e-helsesjef Henrik Erdal i Helse MR.

NRK ventar på svar på fleire spørsmål frå Helse Møre og Romsdal.

Som følgje av feilen må dei 1800 tilsette få nye tilgangskort. For å få nytt kort må tilsette ta med pass eller nasjonalt ID-kort på jobb.

Onsdag har Helse Møre og Romsdal hatt styremøte på Volda sjukehus.

Helseføretaket er i ein alvorleg økonomisk situasjon, og skal kutte ein milliard kroner på tre år.

På styremøtet la dei mellom anna fram planen for omstilling i helseføretaket, og status for budsjett.

I førre veke kom det fram at helseføretaket har behov for å kutte 275 årsverk i 2026.

– Det er ein realitet at dersom ein tar omstillingskravet, og deler på gjennomsnittslønna i vårt helseføretak, så får ein talet 275. Det er ein alvorleg situasjon, seier økonomidirektør Randi Myhre under eit framlegg.

Administrerande direktør Olav Lødemel påpeikte under møtet at kutt i årsverk ikkje nødvendigvis betyr kutt i stillingar.

– Det er ein forskjell på stillingar og årsverk. Ein har ikkje fått konkretisert kva dette betyr. Kostnadane skal ned, og vi har omsett dei til årsverk, det betyr ikkje stillingar.

Styret i helseføretaket har også lagt fram ein plan for korleis dei skal få ned medikamentkostnadane på møtet.

Helse Møre og Romsdal meiner det er behov for å kutte 275 årsverk på klinikkane i 2026.

Det kjem fram i sakspapira til styremøte neste torsdag.

Helse Møre og Romsdal må kutte tilsvarande 500 årsverk innan 2028.

I forslaget til overordna plan til omstilling står det at det er behov for å kutte over halvparten allereie i 2026.

I planen står det at er behov for å kutte 104 årsverk på Sjukehuset i Nordmøre og Romsdal, 29 årsverk på Volda sjukehus og 73 årsverk på Ålesund sjukehus.

Det står også at det er behov for å kutte 24 stillingar på klinikk for psykisk helse og rus og 7 årsverk på klinikk for prehospitable tenestar.

Tillitsvalte har tidlegare uttalt seg kritisk til at det hovudsakleg blir kutta i stillingar, for å spare inn underskotet. Både tillitsvalte og leiinga i Helse Møre og Romsdal seier kutta vil gå ut over pasienttilbodet.

Alle dei 34 kommunane i Midt-Noreg som no har tatt i bruk Helseplattforma, inngår eit samarbeid for å sikre felles utvikling og bruk av journalsystemet.

Det er Trondheim kommune som skal leie samarbeidet.

Målet er å samordne kommunane sine behov overfor Helseplattformen AS, som driftar journalsystemet som både sjukehusa og kommunar har tatt i bruk.

Flere ordførere i fylket ber staten om ekstra midler til Helse Møre og Romsdal.

De mener kutt på 500 stillinger vil ha store negative konsekvenser på helsetilbudet i fylket.

I tillegg mener de at staten må vurdere om det er riktig å tjene på lån til sykehusbygg.

Høye lån er en av årsakene til at Helse Møre og Romsdal går i underskudd.

Det kommer fram i en pressemelding fra, interkommunalt politisk råd: et politisk samarbeidsorgan for kommunene Aukra, Hustadvika, Molde, Rauma og Vestnes i Møre og Romsdal

Ventetida for psykisk helsehjelp for barn og unge er halvert frå 106 til 37 dagar.

Det kjem fram på styremøte i Helse Møre og Romsdal onsdag.

I januar meldte NRK at ventetida var gått ned med 40 døgn. Likevel er Helse Møre og Romsdal dårlegast i landet.

Lange ventetider og stor grad av fristbrot har sett situasjonen ute av kontroll. No er talet på fristbrot gått frå 38 prosent til 0 prosent.

Det siste året har Helse Møre og Romsdal jobba for å ta kontrollen tilbake.

– Vi har fleire pasientar inne, fleire på jobb, og det har hjelpt oss å fange opp fleire, sa Jenny Raftevoll Lyngstad, avdelingssjef psykisk helsevern for barn og unge under styremøte.

Frå i dag har helsepersonell ikkje lenger tilgang til journalsystemet Doculive.

Systemet er erstatta av Helseplattforma, men har vore halde ope medan 27 år med journaldokument frå pasientar i Midt-Noreg har blitt overførte.

Legar har bede helseministeren om å få behalde tilgangen til det gamle systemet, fordi dei fryktar at viktige journaldokument forsvinn eller blir endra.

Helse Midt svarar at det ikkje er noko som tilseier at dokument har forsvunne.