Who qualify for 2026 World Cup and who dey play inter-confederation play-offs

For Africa, DR Congo thrash di Super Eagles of Nigeria to reach Fifa 2026 World Cup inter-confederation play-offs while Portugal and Norway become di latest kontris to book dia places for di tournament.

Plenti kontris don alreadi qualify for di 2026 World Cup while few ones still dey play dia group qualifiers game.

Na total of 32 teams don dey sure of dia place for di 2026 World Cup including England, Croatia, France, Argentina and World Cup first-timers Cape Verde, Jordan and Uzbekistan.

Howeva, e still get 16 spots wey some kontris still need to fill wit di majority dey come from Europe.

DR Congo na di latest of di six kontris wey go play di inter-confederation play-offs to extend dia bid to reach di 2026 Fifa World Cup.

Curacao, Haiti make history

Curacao become di smallest kontri to qualify for di World Cup.

Wit dia population of just 156,000, di carribean kontri squeeze dia way to di tournament afta dia 0-0 draw wit Jamaica.

Di oda kontri wey make history be Haiti.

Dia last appearance for di mundial be in 1974.

Dem beat Nicaragua 2-0 to qualify. Di team play all dia home qualifiers outside Haiti sake of political and gang wahala.

Haiti dey suffer gang violence since 2021 when dem kill dia president.

Dis gangs take ova dia stadium and oda places so dem neva play any home qualifiers dia.

On top of dis problem, di team no get correct set of professional players.

Many of di players be professionals wey decide to play football part-time.

Football dey unite all dis kontris for di World Cup - di dream of every player.

Which kontris don qualify for World Cup inter-confederation play-offs

Di DRC beat Nigeria 4-3 on penalties afta 1-1 draw for di African playoff final.

Meanwhile, Nigeria go miss from a second successive edition of di World Cup afta a poor performance for Rabat.

Na three kontris don progress to di play-off and dem go battle am out for di next stage.

Although dis kontris neva qualify for di tournament in full but dem don confam to take part for di inter-confederation play-offs for March 2026.

Di teams wey remain na two teams from Central America, and one from Asia to qualify for Play-offs.

Teams wey go through to 2026 World Cup

Wales still get chance of finishing top of Group J but go need to beat North Macedonia and hope Belgium lose to Liechtenstein for dia home for di final Group J game.

Switzerland, di Netherlands and Spain go all book dia places no mata di defeats and huge goal difference.

Joint-hosts Canada, Mexico and di United States get automatic qualification.

Australia, Iran, Japan, Jordan, Qatar, Saudi Arabia, South Korea and Uzbekistan don alreadi qualify from Asia.

Oceania get one direct qualification spot and New Zealand don take am.

Tunisia and Morocco na di first two African sides to go through to di World Cup, and Algeria, Cape Verde, Egypt, Ghana, Ivory Coast, Senegal and South Africa join dem.

Brazil, Ecuador, Uruguay, Paraguay and Colombia na di oda South American nations wey don guarantee dia place.

Hosts: Canada, Mexico, United States

Africa: Algeria, Cape Verde, Egypt, Ghana, Ivory Coast, Morocco, Senegal, South Africa, Tunisia

Asia: Australia, Iran, Japan, Jordan, Qatar, Saudi Arabia, South Korea, Uzbekistan

Europe: Croatia, England, France, Norway, Portugal, Scotland, Spain, Switzerland, Austria, Belgium, Netherlands, Germany

Oceania: New Zealand

South America: Argentina, Brazil, Colombia, Ecuador, Paraguay, Uruguay, Curacao

North America: Haiti, Panama

How does World Cup qualifying work?

Each of Fifa six confederations use different methods of qualification to determine which nations qualify for di World Cup.

Oceania na di only continent to complete dia direct qualification process for next year World Cup.

Of di 48 teams for di 2026 tournament, dem give three places to di host nations and 43 go earn dia spot through direct qualification from di six confederations.

Di oda two spots go dey determined by intercontinental play-offs.

Europe

Qualifying places: 16

Teams already through: Croatia, England, France, Norway, Portugal

Teams guaranteed play-off (at least) through qualifying: Germany/Slovakia, Switzerland/Kosovo, Denmark/Scotland, Spain/Turkey, Republic of Ireland, Netherlands/Poland, Austria/Bosnia, Italy.

E get 12 groups and di winners of each go qualify for di World Cup.

Europe na di only continent wey no get any team for di intercontinental play-offs.

Qualifying game bin start for March 2025 - wit some teams not even playing dia first qualifiers until September sake of di Nations League.

Di group stages go end dis week, while di play-offs go start for March 2026.

Scotland beat Denmark 4-2 for dia dramatic home game to qualify.

Scott McTominay score one scissor goal from a cross to lead di team to dia famous win.

Belgium scata Liechtenstein 7-0 to take top spot in their final game.

Di Netherlands also beat Lithuania 4-0 to seal qualification.

Poland go need to win for Malta wit goal difference swing of 13 goals.

Austria draw 1-1 wit Bosnia-Herzegovina for dia final group game on Tuesday to qualify. Bosnia go enta playoffs.

Spain draw 2-2 wit Turkey for dia final group game to win di group wit three points, wit superior goal difference.

Germany sama Slovakia 6-0, for dia group to go through as group leaders wit 15 points, di Slovaks finish second wit 12 points.

Switzerland qualify wit dia 1-1 draw wit Kosovo for dia final group game.

South America

Qualifying places: Six, plus one into intercontinental play-offs

Teams already through: Argentina, Brazil, Colombia, Ecuador, Paraguay, Uruguay

Intercontinental play-offs: Bolivia

South American 10 teams play 18 games each, and di process start for September 2023.

Di top six all reach di World Cup, wit di side wey dey seventh place go into di intercontinental play-offs.

Wit group qualifying now ova, Bolivia beat Brazil 1-0 for di final round of games to reach di intercontinental play-offs.

Asia

Qualifying places: Eight, plus one into intercontinental play-offs

Teams already through: Australia, Iran, Japan, Jordan, Qatar, Saudi Arabia, South Korea, Uzbekistan

Asian qualifying game start for October 2023 wit di lower-ranked teams in action.

For di third round, di top two teams for three different groups qualify automatically.

Australia, Iran, Japan, Jordan, Qatar, Saudi Arabia, South Korea and Uzbekistan don secure dia places.

One oda side go progress through di intercontinental play-offs, wey follow Asia play-off for November.

Dat na between UAE and Iraq - wey draw dia first leg 1-1.

Africa

Qualifying places: Nine, plus one into intercontinental play-offs

Teams already through: Algeria, Cape Verde, Egypt, Ghana, Ivory Coast, Morocco, Senegal, South Africa, Tunisia

Intercontinental play-offs: DR Congo

E get nine African groups of World Cup qualifiers, each wit six teams, wey start for November 2023.

Di top team from each group go through automatically - wia Algeria, Cape Verde, Egypt, Ghana, Ivory Coast, Morocco, Senegal, South Africa and Tunisia guarantee dia places.

Di best four runners-up go into play-offs for November for di chance to earn dia spot for di intercontinental play-offs.

DR Congo beat Nigeria for di final.

North, Central American and Caribbean

Qualifying places: Six (including three hosts), plus two into intercontinental play-offs

Teams already through: None through qualifying - Canada, Mexico and United States automatically as co-hosts

Di Concacaf qualifier get different look to usual, as three of dia biggest hitters no dey involved as dem don qualify as hosts, but plenti spots still dey.

Twelve teams dey involved for di third round of qualifier wey start dis month.

Di winners of each group go to di World Cup and di two best-ranked runners-up going into di intercontinental play-offs.

Oceania

Qualifying places: One, plus one nation into intercontinental play-offs

Teams already through: New Zealand

Oceania qualifier don alreadi end - wit New Zealand beating New Caledonia 3-0 for di final.

New Zealand go through to di World Cup automatically, as a result of di expanded World Cup. Oceania usually only get a play-off spot.

New Caledonia go take part for intercontinental play-offs for March 2026 - featuring teams from Africa, Asia, South America and North America - wit two out of six teams going through.