Taraz

Taraz
Тараз / Taraz
	Lidnanznam;
Valdkund	Kazahstan
Eläjiden lugu (2023)	427,256 ristitud
Pind	187,87 km²
Pämez'	Bahitžan Orinbekov; (sügüz'ku 2022—,; Бақытжан Орынбеков)
Telefonkod	+7−7262
Aigvö	UTC+6

Taraz (kaz.: Тараз / Taraz, ven.: Тара́з) om lidn Kazahstanan suves. Se om valdkundan kudenz' lidn eläjiden lugun mödhe, om Žambilan agjan administrativižeks keskuseks da palaks.

Istorii

Eländpunktan aluz om pandud ezmäižel voz'sadal EME. Mainitase vl 400 Grekanman purtkiš kuti Tolos-lidn (Tolisa) Surel Šuuktel. Lidnan nimituz oli Aulie-At (Aulie-Ata) vll 1856−1936, Džambul vll 1938−1993 i vhesai 1997 Žambil (kaz.: Жамбыл). Vl 1917 raudte tuli lidnha.

Taraz šingotase himižel tegimištol fosforan löudmižsijidenno (sidä kesken heretusiden pästand), sömtegimištol, raudan ühthesuladusiden pästandal, sauvondmaterialiden da konstrukcijoiden tehmižel, nahktegimel i kengiden fabrikal.

Geografijan andmused

Lidn sijadase agjan suvipäivlaskmas, Talas-jogen randal, Kirgizstanan röunanno, 610 m ü.m.t. keskmäižel korktusel. Om korktoid mägid ümbrištos.

Klimat om terav kontinentaline. Voden keskmäine lämuz om +11,2 C°, kezakun-elokun +23,4..+25,5 C°, tal'vkun-uhokun −1,3..−3,0 C°. Absolütine minimum oleskeli −40 C° (uhoku), maksimum +43,7 C° (heinku). Kezaaigan minimum om +3,0 C° (kezaku, eloku), tal'vaigan maksimum om +25,0 C° (uhoku). Ei voi panda halad kezakus-elokus. Paneb sadegid 344 mm vodes, enamba keväz'kus-semendkus (39..44 mm kus), vähemba heinkus-sügüz'kus (8..19 mm kus).

Eläjad

Vl 2014 lidnan eläjiden lugu oli 351 476 ristitud, vl 2018 — 356 069 ristitud, vl 2021 — 362 965 ristitud. Kaikiš suremb lidnan ristitišt om nügüd'.

Transport

Avtobusad oma kundaližeks transportaks lidnas. Päraudtestancii i avtostancijad ratas siš.

Rahvahidenkeskeine soda- da civiline Aulie-At-lendimport (kaz.: «Әулие-Ата» халықаралық әуежайы, DMB / UADD / ДМБ, 55 tuh. passažiroid vl 2016) sijadase kümnes kilometras suvipäivlaskmha orhal lidnan keskusespäi. Tehtas reisid nenihe lidnoihe: Almati, Astan, Moskv.