Anette Trettebergstuen er ein norsk politikar for Arbeidarpartiet som var stortingsrepresentant frå Hedmark 2005–2025. Ho var kultur- og likestillingsminister i regjeringa Støre frå 2021 til juni 2023.
Anette Trettebergstuen
Faktaboks
Anette Trettebergstuen
- Fødd
- 25. mai 1981, Hamar, Hedmark
Bakgrunn
Anette Trettebergstuen kjem frå Hamar og tok grunnfag i statsvitskap ved Universitetet i Oslo 2000–2001, studerte offentleg styring ved Høgskolen i Oslo 2002–2003 og tok til på med ein mastergrad i rettsvitskap ved Universitet i Oslo (2014–2017).
Politisk karriere
Trettebergstuen melde seg inn i AUF som 13-åring. Ho har arbeidd som prosjektmedarbeidar i Europeisk Ungdom i 2000–2002 og var fylkessekretær i Hedmark AUF i 2002. 2002–2004 var Trettebergstuen leiar i Hedmark AUF og 2004–2006 sentralstyremedlem i AUF.
Trettebergstuen var medlem av Hamar bystyre 1999–2005 og medlem av formannskapet 2003–2005. Ho var politisk rådgivar for stortingsgruppa til Arbeidarpartiet 2003–2005 før ho blei vald til stortingsrepresentant frå Hedmark i 2005. Frå 2004 var ho nestleiar i Hedmark Ap og frå 2009 medlem av sentralstyret i Arbeidarpartiet.
På Stortinget var Trettebergstuen andre nestleiar i arbeids- og sosialkomiteen 2009–2013 og i familie- og kulturkomiteen 2015–2017; første nestleiar 2017–2021. Trettebergstuen tiltredde som kultur- og likestillingsminister i regjeringa Støre i 2021. Politisk har ho særleg arbeid for likestilling i arbeidslivet, for kultur og for europeisk samarbeid.
23. juni 2023 trakk Trettebergstuen seg som minister etter at ho hadde brote reglane for habilitet i utnemningar av personar til offentlige verv og styreposisjonar. Ho tok heller ikkje attval til Stortinget i 2025.
Andre verv
Trettebergstuen har hatt fleire administrative verv og tillitsverv. Ho var leiar av Hedmark Europeisk Ungdom i 1998–2000, medlem av sentralstyret til Europeisk Ungdom i 2000–2001 og politisk nestleiar i organisasjonen i 2001–2002. Ho sat i styret for Europabevegelsen i 2007–2009, og frå 2015 er ho medlem av styret for Hamar Energi Holding.
Trettebergstuen har vore ein klar og tydeleg talsperson for feminisme og skeive over lang tid. Hun utgav i 2017 boka Homo saman med Bård Nylund.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.