Dinastia Tang

La Dinastia Tang (en xines: 唐朝), o la Impero Tang, ia es un dinastia imperal de Xina, cual ia governa de 618 a 907, con un interena inter 690 e 705. Lo ia es presededa par la Dinastia Sui e segueda par la periodo de Sinco Dinastias e Des Renas. La Dinastia Tang es videda como un punta alta de la sivilia xines, e un eda oro de la cultur mundal.

La familia Li ia fundi la dinastia pos profita de la descrese de la dinastia Sui e ativi sua cade final. La dinastia ia comensa con un periodo de progresa e de stablia en la dui prime de sua governa. La dinastia ia es interompeda inter 690 e 705, cuando la imperoresa Wu Zetian ia saisi la trono e proclama la dinastia Wu Zhou. La rebela gidada par An Lushan (755-763) ia causa la ruina e la descrese de la autoria sentral en la dui tarda de la dinastia. La Tang ia manteni un sistem de servi sivil per enscrive ofisiores erudita per esamines normida. La leva de governores militar rejional conoseda como jiedushi en la sentenio 9 ia sumina esta ordina sivil. Rebelas cultival ia causa la desloca e perde grande de popla, la povria vasta e la plu malfunsiona de la governa, cual ia fini la dinastia en 907.