Fundamentalizm

Fundamentalizm keń mánide — belgili bir táliymat aqidalarınıń ózgermeytuǵınlıǵın járiyalaytuǵın, isenimdi aqılıy dálillerden ústin qoyatuǵın, ilahiy kitaplardaǵı ayatlar qanday mániste bayan etilgen bolsa, sol mániste qabıllanıwın talap etetuǵın, áyne waqıtta olardı materiallıq mánide ańlatıwdı maqulllamaytuǵın, din tiykarların ózgertpey durıs orınlawdı talap etetuǵın sociallıq, diniy jónelisler. Tar mánide — protestantizmdegi ortodokslıq aǵımlar. 1910-jıllarda AQShtıń qubla shtatlarında payda bolǵan. OLar xristianlıqtıń dásturiy aqidalarına, ásirese, «Bibliya»nıń jetikligine isenimdi bekkemlewdi, onı sózbe-sóz túsiniwge, túsindiriwge qattı ámel etiwdi talap etedi. 1919-jılı Filadelfiyada Jáhan xristian fundamentalistleri associaciyasına tiykar salındı. XX ásirdiń 70-jıllarınan fundamentalizm sózi islamǵa qarata qollanıla baslandı. Islam fundamentalizmi «Quran» hám hádislerdi sózbe-sóz ańlatıwdı hám eń dáslepki islamǵa qaytıwdı úgitleydi.