William Forsyth Sharpe

William Forsyth Sharpe (fæddur 16. júní 1934) er bandarískur hagfræðingur sem hlaut Nóbelsverðlaunin í hagfræði árið 1990, ásamt Harry Markowitz og Merton Miller, fyrir að þróa líkön til að aðstoða við ákvarðanatöku í fjárfestingum. Sharpe er þekktastur fyrir að þróa verðlagningarlíkanið um fjármálaeignir (CAPM) á sjöunda áratugnum. CAPM-líkanið lýsir sambandi kerfisbundinnar áhættu og væntanlegrar ávöxtunar. Líkanið segir að nauðsynlegt sé að taka meiri áhættu til að afla meiri ávöxtunar. Hann er einnig Þekktur fyrir að búa til Sharpe-hlutfallið, tölu sem er notuð til að mæla áhættu ávinningshlutfalls fjárfestingar.

CAPM

Sharpe er þekktastur fyrir hlutverk sitt í þróun verðlagningarlíkans um fjármálaeignir (Capital Asset Pricing Model eða CAPM) sem er orðið grundvallarhugtak í fjármálahagfræði og eignastýringu. Kenningin á uppruna sinn í doktorsrannsókn hans. Sharpe skilaði ritgerðinni til Journal of Finance árið 1962. Ritgerðin fékk neikvæð viðbrögð í fyrstu og var síðar gefin út árið 1964 eftir breytingar á ritstjórn. CAPM-líkanið byggist á þeirri kenningu að væntanleg ávöxtun hlutabréfa ætti að vera áhættulaus ávöxtun plús beta fjárfestingarinnar margfaldað með markaðsáhættuálagi. Áhættulausa ávöxtunin bætir fjárfestum upp að binda peningana sína, en beta og markaðsáhættuálagið bætir fjárfestum upp þá viðbótaráhættu sem þeir taka á sig umfram það að fjárfesta í ríkisskuldabréfum sem veita áhættulausa ávöxtun.

Sharpe-hlutfallið

Sharpe bjó einnig til Sharpe-hlutfallið. Hlutfallið er mælikvarði á ávöxtun eignasafns að teknu tilliti til áhættuleiðréttingar. Mælikvarðinn metur hlutfall ávöxtunar umfram áhættulausa ávöxtun og heildaráhættu eignasafns sem er mæld með staðalfráviki ávöxtunar, en staðalfrávikið endurspeglar sögulegt flökt ávöxtunar. Tvö eignasöfn geta haft svipaða ávöxtun, en Sharpe-hlutfallið sýnir hvort þeirra tekur meiri áhættu til að ná þeirri ávöxtun. Hærri ávöxtun með minni áhættu er betri og Sharpe-hlutfallið hjálpar fjárfestum að finna hana.