Thomas R. Marshall
| Thomas R. Marshall | |
|---|---|
.jpg) | |
| Varaforseti Bandaríkjanna | |
| Í embætti 4. mars 1913 – 4. mars 1921 | |
| Forseti | Woodrow Wilson |
| Forveri | James S. Sherman |
| Eftirmaður | Calvin Coolidge |
| Fylkisstjóri Indiana | |
| Í embætti 11. janúar 1909 – 13. janúar 1913 | |
| Vararíkisstjóri | Frank J. Hall |
| Forveri | Frank Hanly |
| Eftirmaður | Samuel M. Ralston |
| Persónulegar upplýsingar | |
| Fæddur | 14. mars 1854 North Manchester, Indiana, Bandaríkjunum |
| Látinn | 1. júní 1925 (71 árs) Washington, D.C., Bandaríkjunum |
| Þjóðerni | Bandarískur |
| Stjórnmálaflokkur | Demókrataflokkurinn |
| Maki | Lois Kimsey (g. 1895) |
| Börn | 1 (fóstursonur) |
| Háskóli | Wabash College (BA) |
| Undirskrift |  |
Thomas Riley Marshall (14. mars 1854 – 1. júní 1925) var bandarískur stjórnmálamaður úr Demókrataflokknum. Hann var fylkisstjóri Indiana frá 1909 til 1913 og síðan varaforseti Bandaríkjanna frá 1913 til 1921 í forsetatíð Woodrows Wilson.
Æviágrip
[breyta | breyta frumkóða]Thomas R. Marshall fæddist 14. mars 1854 í Indiana. Hann nam lögfræði og hlaut lögmannsréttindi í Indiana árið 1875.[1][2][3][4]
Marshall var fylkisstjóri Indiana frá 1909 til 1913. Hann var talinn framfarasinni en honum tókst ekki að koma umbótatillögum sínum í gegnum þing Indiana né að gera breytingar á stjórnarskrá fylkisins á kjörtímabili sínu.[5]
Á landsþingi Demókrataflokksins í Baltimore árið 1912 var stungið upp á Marshall sem forsetaefni fyrir kosningarnar það ár til að miðla málum milli ólíkra fylkinga flokksins. Þegar William Jennings Bryan, frambjóðandi popúlista, lýsti yfir stuðningi við Woodrow Wilson runnu þessar tillögur út í sandinn. Í staðinn var Marshall valinn varaforsetaefni á kjörseðlinum með Wilson. Þeir Wilson unnu sigur í forsetakosningunum 1912 og voru endurkjörnir árið 1916. Marshall er síðasti fylkisstjórinn til þessa dags sem hefur lokið tveimur kjörtímabilum í embætti varaforseta Bandaríkjanna.
Thomas R. Marshall var ekki náinn Wilson og hann var sjaldan hafður með í ráðum við mikilvægar ákvarðanir. Marshall gantaðist um varaforsetaembættið áður en hann fór til Washington til að taka við því: „Hafið þið heyrt um manninn sem átti tvo syni? Annar fór á sjó og drukknaði en hinn var kjörinn varaforseti. Hvorugur þeirra sást framar.“[6] Ekki var útséð að Marshall fengi tilnefningu Demókrataflokksins til varaforsetaembættisins í annað skipti árið 1916. Woodrow Wilson ákvað að endingu að hafa Marshall áfram á kjörseðlinum til þess að viðhalda einingu innan Demókrataflokksins. Þeir urðu því fyrsti forsetinn og varaforsetinn sem náðu endurkjöri saman frá árinu 1820.[7][8]
Marshall gegndi veigameira hlutverki á seinna kjörtímabili sínu. Wilson sendi hann í ferðir vítt og breitt um Bandaríkin til að afla stuðnings alþýðunnar við stríðsreksturinn eftir að Bandaríkin gengu inn í fyrri heimsstyrjöldina. Hann varð jafnframt fyrsti varaforseti í sögu Bandaríkjanna sem fékk að stýra tilteknum ríkisstjórnarfundum og fór með forsetavald innanlands þegar Wilson fór til Evrópu til að undirrita Versalasamninginn. Frá október 1919 hrakaði heilsu Wilsons verulega eftir að hann fékk heilablóðfall en ráðgjafar hans og forsetafrúin Edith Wilson höfðu ímugust á Marshall og greindu honum því ekki frá ástandi forsetans. Margir embættismenn og þingmenn hvöttu Marshall til að gerast starfandi forseti en Marshall varð ekki við þessu þar sem hann vildi ekki setja fordæmi fyrir því að forsetinn væri sviptur völdum gegn vilja sínum.
Eftir lok kjörtímabilsins árið 1921 sneri Thomas R. Marshall aftur til Indianapolis. Hann ritaði bækur um lögfræði og endurminningar sínar. Hann lést í ferð til Washington árið 1925 og var jarðsettur í Crown Hill-kirkjugarðinum í Indianapolis.[9][10][11]
Tilvísanir
[breyta | breyta frumkóða]- ↑ Gugin og St. Clair, ritstj., 2006, bls. 234.
- ↑ Bennett 2007, bls. 19–20
- ↑ Gray 1977, bls. 282
- ↑ Jehs, bls. 222.
- ↑ Gray 1977, bls. 290.
- ↑ Harstad 2014, bls. 46.
- ↑ Gugin og St. Clair, ritstj., 2006, bls. 240.
- ↑ Bennett 2007, bls. 215.
- ↑ Gugin og St. Clair, ritstj., 2006, bls. 241.
- ↑ Gray 1977, bls. 306.
- ↑ Bennett 2007, bls. 308.
Heimildir
[breyta | breyta frumkóða]- Bennett, David J (2007). He Almost Changed the World: The Life And Times Of Thomas Riley Marshall. Freeman & Costello. ISBN 978-1-4259-6562-4.
- Gugin, Linda C.; St. Clair, James E, ritstjórar (2006). The Governors of Indiana. Indianapolis, Indiana: Indiana Historical Society Press. ISBN 0-87195-196-7.
- Harstad, Peter T. (Fall 2014). „'What this country needs is a really good five-cent cigar': A Historical Puzzle“. Traces of Indiana and Midwestern History. 26 (4). Indianapolis: Indiana Historical Society: 44–55.
- Jehs, Randall W., "Thomas R. Marshall: Mr. Vice President, 1913–1921," in Gray, Ralph D (1977). Gentlemen from Indiana: National Party Candidates,1836–1940. Indianapolis: Indiana Historical Bureau. ISBN 1-885323-29-8.
| Fyrirrennari: James S. Sherman |
|
Eftirmaður: Calvin Coolidge | |||
