Anthony Giddens
Anthony GIDDENS, Barono Giddens (naskita la 18-an de januaro 1938 en Edmonton, Londono) estas angla sociologo kaj dumviva nobelo. [1]
Li laboris ĉe la Universitato de Leicester, la Universitato de Kembriĝo; direktoro de la Londona Lernejo de Ekonomiko kaj Politika Scienco (1997-2003), kie li nuntempe estas honora profesoro. Premiito de la Premio Princo de Asturio (2002, sociaj sciencoj).
Giddens estas konsiderata unu el la plej signifaj nuntempaj sociologoj, kaj estas la aŭtoro de 34 libroj publikigitaj en 29 lingvoj. En 2007, Giddens estis rangita kvina en la listo de la plej cititaj akademiuloj en la humanismaj sciencoj. [2][3] Li estas konata pro sia struktura teorio kaj sia holisma originala koncepto pri modernaj socioj.
La scienca agado de Giddens povas esti dividita en tri periodojn. La unua karakteriziĝas per la kreado de nova vizio de sociologio, ĉefe en la kampo de teorio kaj metodaro, bazita sur kritika kompreno de la klasikaĵoj. La ĉefaj verkoj de ĉi tiu periodo estas Capitalism and Modern Social Theory ("Kapitalismo kaj Moderna Socia Teorio", 1971) kaj New Rules of Sociological Method ("Novaj Reguloj de Sociologia Metodo", 1976). En la dua etapo, Giddens evoluigis la teorion de strukturado, sintezante strukturan funkciismon kaj mikrosociologion. La libroj Central Problems in Social Theory ("Centraj Problemoj de Socia Teorio", 1979) kaj The Constitution of Society ("La Strukturo de la Socio", 1984) alportis al li internacian sciencan famon.
La tria periodo inkluzivas la intereson de Giddens pri la problemoj de moderneco, tutmondiĝo kaj politiko, ĉefe la influon de moderneco sur la socian kaj politikan ĉiutagan vivon. Li kritikas postmodernismon kaj analizas la eblecon de "tria vojo" en politiko. La ĉefaj verkoj de ĉi tiu periodo estas:
The Consequences of Modernity ("La Sekvoj de Moderneco", 1990), Modernity and Self-Identity ("Moderneco kaj Mem-Identeco", 1991), Beyond Left and Right ("Preter Maldekstro kaj Dekstro", 1994) kaj The Third Way ("La Tria Vojo: Renovigante Socialdemokration", 1998). En ĉi tiuj verkoj, Giddens revizias socian teorion kaj alirojn al la disvolviĝo kaj ŝanĝoj de moderneco.
En la politika sfero, li agis kiel teoriulo de " nova laborismo " kaj la " tria vojo ". En junio 2004, pro siaj servoj, Giddens ricevis dumvivan nobelecon, fariĝante Lordo kaj Barono Southgate. [4] Ekde 2005, li sidas kiel membro de la Ĉambro de Lordoj de la Brita Parlamento, reprezentante la Laboristan Partion.
Li estas estrarano de diversaj publikaj organizaĵoj, inkluzive de la Instituto por Publika Politika Esploro en Britio. Ekde 1985, li estas kunfondinto de unu el la plej grandaj akademiaj sciencaj eldonejoj de Britio, Polity Press Ltd. [5]
Referencoj
[redakti | redakti fonton]- ↑ Giddens, Baron, (Anthony Giddens) (born 18 Jan. 1938) (angle) (2007). Alirita 2024-10-04 .
- ↑ Gill, J. (2009) Giddens trumps Marx but French thinkers triumph, Times Higher Education, 26 March 2009
- ↑ Times Higher Education Most cited authors of books in the humanities, 2007, Times Higher Education, 26 March 2009.
- ↑ UniSA honours influential social theorist Professor Lord Anthony Giddens. unisa.edu.au. Alirita 19 September 2016 .
- ↑ Open Syllabus.